في عين غيرك أنثى سهلة الاصطياد

إعادة نشر القصة للعبرة والحذر انت بنتك تبانلك مجرد طفلة لكنها في عين غيرك أنثى سهلة الاصطياد القصة التي انتهت بكارثة وصدمة ومصيبة:
الحلقة 1
_تبدا حكايتنا في جنوب الجزائر عام 2018 انا رحمة 15سنة نقرا في المتوسطة نوجد روحي للبيام جمالي مقبول كما اي فتاة عادية معيشتنا عادية بزااف بابا بسيط جدا و يما ربت بيت بابا موظف عمومي في بلادية و عندي ثلاث خوتي دراري و ختي اكبر مني بعامين كانت حياتي كلها فرح و سعادة حتان دخل عام2018 كولش دار عليا راح نشرككم اليوم قصتي بلسان اختي نتمنى تكون عبرة للبنات 

_حكمت تلفوني كي العادة نتاعي نتمسخر بالرجال نعيط ماسكي نتمسخر بيهم انا و صاحباتي كانت عادتنا المفظلة انو نتمسخرو بالرجال و نجيبو بيهم وقت و كانت تقعد معانا اختي لكبيرة و كامل طايحين على بعضانا بالضحك 
حتان واحد المرة طوحت في مولا الفول اللي حياتي بسبتو تبدلت 
جبت رقمو من الفيسبوك كونت دخلة في قروب مسنجر بعتلي بريفي و قبلتو بديت نحكي معاه و قنعني نكلمو قوتلو نكلمك برقم ماما بيسك تلفون انا ماعنديش نكلمك ماسكي قالي اوكي
كلمتو و كانت حدايا ختي لي مانخبي عليها والو قالي الو نت منين و بديت نتمسخر بيه قالي حاب نشوفك رانا من نفس الولاية قوتلو اوكي كتاه نتلاقاو قالي غدوا اذا تحبي قوتلو اوكي 
كوبيت عليه شدتني ختي ياه نت مريضة حابا تتلاقيه و كان يديرلك حاجة خطيك منو
 قوتلها لالا راح نجيبو و كي يلحق للبلاصة نقولو مانيش جايا نديرها بيه ضحكت ختي و قالتلي ماتغامريش بينا 
قوتلها ماتخافيش تعرفني فايقة رقدت و انا ماعلباليش بلي بالجاست هذي راح نكتب على روحي العذاب 
جاء الصباح و قولت للبنات ليوم راح نجيب واحد نتسمخرو بيه و نشوفه من بعيد كيفاه راه يحوس عليا من بين البنات نضيعوه قالولي اوكي 
دخلت للقسم نقرا و بديت نستنى في الساعة تفوت باش نخرج برا و نكلمو من تلفون صاحبتي ماسكي 
فاتت الساعة و خرجت نجري قبل ماتدخل استادة الفرونسي للقسم هربت مع العصابة نتاعي 
خرجنا و قعدنا حدا ليكول كلمتو وينك قالي راني في طريق لحقتو وين نقرا اكزاكت و بديت نكذب عليه انا لي تريكوها كحل و سروال تجيل و طالقة شعري و هو يحوس و حاكم ساشي في يدو يبان جاء و جاب معاه كادو ليا مسكين خسرتو في جيبو 
المهم بديت نكذب عليه راني من راني لهيه و هو يحوس حتان سمع ضحك صاحباتي قالي راكي تتمسخري بيا ضحكتلو ههههه من نيتك انا نتلقا بواحد كما نت لي قبلك ماشافوش وجهي باش تشوفو نت و كوبيت تلفون عليه 
نشوف فيه من بعيد يطيح في الهدرة و يعيط رما الكادو في لاكوبال و راح و انا طايحا عليه بالضحك مع البنات 
كونت حاسبتها عادي كما موالفة نتمخسر و بعد مدة ينسوني حتى هذي المرة راح ينساني ماحطيتوش كل في راسي 
ماكانش علبالي بلي حقد عليا ايه لبنات حقد عليا يكذب عليك لي يقولك كي تتحلف فيك المراء بات قاعد و كي يتحلف فيك الراجل بات راقد العكس الراجل اذا كسرتيلو قلبو تهردت عليك
المهم فاتو ليام على الضربة هذي تقريبا 11 يوم طبعا بعد ما حكيت لختي واش درت في راجل قالتلي علاه مسكين والله ماتربحيها ماكونتش حاطا هدرتها في راسي 
في يوم و انا في دار حكما تلفون يما نكونكتي كما العادة نتاعي بعتلي واحد انفي روحت نشوف شكون نلقى رسالة تهديد مكتوبة فيها نحكمك موك ..... يا رحمة حورت شكون هذا لي عرف اسمي منين جاب اسمي الحقيقي حطيت تلفون من يدي و ماقدرتش نجاوب وليت نرجف شكون هذا منين يعرفني واش حاب مني 
دخلت ختي لعندي واش بيه وجهك صفر قوتلها شوفي قالتي ياااه شكون هذا منين عرف اسمك
 قوتلها حتى انا مانيش عارفة اول مرة راجل يعرف اسمي قالتلي قولي لبابا قوتلها لالا والله يدبحني راني فاتحا الفيس بدون علمو ولا نسيتي قالتلي ايه نسيت والله مشكل قعدنا نخمامو في حل 
قالتلي ختي ممكن وحدا من صحباتك حبت تتمسخر معاك قوتلها انا ايه ممكن بيسك ماكانش لي راح يعرف اسمي من غير صاحباتي 
جات القايلة لبست قشي باش نروح لليكول.
حكمت تلفون يما باش نسكر فيسبوكي و نخرج من دار جاتني رسالة ثانية و هذي مرة غير رسالة الاولى هذي المرة كتب رقم يما و قالي جبرتك يا رحمة